Lemmee kiäinuh

25.9.2020
Koronavirus keežild luándust-uv lii tergâd toollâđ torvokooskâid já čuávvuđ eromâš kietâhygienia om. tuuvijn, tulâstâllâmsoojijn já hiivsigist ellimij maŋa. Meccihaldâttâs miärádâs já ravvuuh peividuvvojeh, ko almolâš koronaravvuuh šaddeh tärhibin. Keejâ lasetiäđuid já čuávu mii ravvuid (suomâkielân).

 

Vandârdemkiäinuh já pálgáh

Merkkejum vandârdemkiäinuh láá Lemmee aalmuglâšmeeci virkosmittemstiellâsist suullân 60 km.

Kiäinui vyelgimsajeh

Aalmuglâšmeeci merkkejum kiäinuh vyelgih Njurgoiluovtâ siijdâst, eereeb Sallâvääri päälgis. Sallâvääri päälgis vuálgá Aanaar-Kittâl –maađij (955) piällást Riemâšjuuvâst.

Luándupäälgis

  • Lemmee luandupäälgis, 4,5 km, álgá Njurgoiluovtâst já jotá Lemmee paaldâst. Aalgâkeččin láá kodderogeh sehe juuhân jiešvuođâliih puolžah. Kyevti kilomeetter maŋa päälgis jorgeet nuortâs já muhâttâl tiäváás pecienâduvvâst maassâd vyelgimsajasis.
    • Palvâlusah: Tulâstâllâmsaje já luándupálgá taavluh.

Riggeekiäinu

  • Juuvâkiellâs riggee, 18 km, vuálgá Njurgoiluovtâst Juuvâkiellâs (534 m) tuoddâr kuávlun, mon aalaa alne lekkâseh uáinuseh Lemmee aalmuglâšmiäcán já Pänituoddâr meccikuávlun. Maassâd Njurgoiluohtân kiäinu jotá Lemmee paaldâst.
    • Palvâlusah: Kiäinu piällást láá nelji tulâstâllâmsaje já kuáđi.
    • Uáinámušah: Juuvâkiellâs tuodâr
  • Rovâdâsjävri - Suohpásávži Kuldal – Kollehaammân – Rovâdâsjävri, 26,5 km. Kiäinu jotá Rovâdâsjäävrist Gaskoaivi peht Suohpásávži Kuldalân, mii lâi 1940-50-lovvoost Lemmee kollekuáivoi kuávdáš. Kuldalist kiäinu máccá Kollehamânân já Rovâdâskorže peht Rovâdâsjáávrán. Taam riggeekiäinu puáhtá ovtâstittiđ mano- teikkâ puátumääđhist Njurgoiluohtâ – Rovâdâskorže –kiäinun já/teikkâ kärbismáátkán.
    • Palvâlusah: Kiäinu piällást láá tulâstâllâmsajeh já telttaastâllâmsajeh, ävđintuveh Rovâdâsjäävrist, Suohpásávži Kuldalist já Kollehamânist sehe láigukámppá Suohpásávži Kuldalist. Suohpásávži Kuldalist lii uápistemsaje, mii muštâl kollekuáivum historjást. Njurgoiluohtâ-Rovâdâsjävri-Kollehaammân kooskâst joteh kárbáh kuábbáá-uv kuávlun (vuárukärbisjođettem).
    • Uáinámušah: Lemmee vyemi, Rovâdâskorže, Kollekuávlu, Suohpásávži Kuldal

Eres kiäinuh

  • Njurgoiluohtâ – Rovâdâsjävri, 15 km. Kiäinu čuávu Lemmee ruávis pecimeeci čoođâ. Juuvâ puáhtá mokseđ Seereehnjave leirâdemsaje peht teikkâ Ergijävrkuoškii peht, kost lii kaabelkäärbis moksem várás. Ergijävrkuoškiist mätki juátkoo Rovâdâsjäävri ävđintupán, kost puáhtá vala juátkiđ čuálččáás Rovâdâskooržán, suullân 1 km. Rovâdâsjäävri ävđintuuveest puáhtá maccâđ Njurgoiluohtân moottorkärbissáttoin.
    • Palvâlusah: kuttâ tulâstâllâmsaje, Rovâdâsjäävri ävđintupe, Ergijävrkuoškii láigukámppá. Vuárukärbisjođettem Njurgoiluohtâ-Rovâdâsjävri-Njurgoiluohtâ kooskâst.
    • Uáinámušah: Lemmee vyemi, Rovâdâskorže.
  • Sallâvääri päälgis, 12 km, vuálgá Aanaar-Kittâl maađij piällást Sallâvääri pygálysääiđi kuvlân. Vyelgimsaajeest lii uápistemtavlu, mii muštâl Sallâvääri historjást. Ääiđi kulen piäsá maassâd siämmáá pálgá mield.

Miällumkiäinu

Lemmee mield puáhtá miälluđ kyevti kuávlun.

  • Njurgoiluohtâ – Kollehaammân, suullân 20 km. Miällumkiäinu kiävttá siämmáá väävli ko vuárukärbisjotoluv juhâkárbáh.
  • Njurgoiluovtâst puáhtá vyelgiđ meid Lemmee mield tavenuortâs Pááđáárjáávrán, kost piäsá juátkiđ ovdâskulij Juvduu viestârpel Solojáávrán, kost vandârdem puáhtá lopâttiđ kárbályeštimsajan. Kiäinu kukkodâh lii suullân 40 km, já tot lii viehâ älkkee. Miällum várás kannat väridiđ ääigi 2-3 peeivi. Juvduu mield puáhtá miälluđ Aanaar markkânân, mutâ tot váatá jo kuoškâmiällumhárjáneme já aainâs-uv Njuámmilcoskâs kalga karveđ eennâm mield. Pááđáárjäävrist puáhtá mulsâiävtulávt juátkiđ rávhálii Kiäptuvei mield Muddusjáávrán.

Kanottijd puáhtá laiguuttiđ Lemmee irâtteijein.