Uđâsarkkâdâh

Tavveen eelih čuovâdis iijâi kiiđâ

Kalender čáittá vyesimáánu pelimudo, veikkâ Tave-Laapi muottuu mere kejâdijn ij oskoččij. Vyesimáánu pelimuddo táárkut meiddei tom, ete ijâttes ijjâ lii älgimin. Njuárgámist piäiváš paijaan vástuppeeivi já luáštá čuávuváá keerdi syeinimáánu loopâst. Anarist ijâttes iijâ peessih viettiđ suullân oho maŋeláá.

Onne álgá kyevti já pele mánuppaje kukkosâš koskâiijâ piäiváá äigi. Kove: Markku Porsanger.

Iijah láá Tave-Laapist lamâš čuovâdeh jo maaŋgâ oho, tastko piäiváš ájánist almeroobdâ tyehin tuše puudâ. Ucjuuv Njuárgámist piäiváš luáštá majemuu keerdi tuorâstuv 14.5. já vástuppeeivi 15.5. koskâsâš iijâ, mutâ tot paijaan uáinusân uđđâsist kuulmâ miinuut keččin. Tast álgá kyevti já pele mánuppaje kukkosâš koskâiijâ piäiváá äigi. Aanaar aloduvvâst ijâttes ijjâ álgá 21.5. já nohá kyevti mánuppaje keččin.

Ucjuuv já Aanaar kuávlust muotâ lii vala siämmáá verd ko táválâš tälvin njuhčâmáánu muddoost. Muotâ lii saje mield suullân 60-70 cm já cuoŋŋuuh láá iijâpuolâšij tiet kyeddileh. Juhâleevijn kiđđâ lii läävhi oovdeld ko tuoddârijn. Maadâvieltijn puáhtá pievlâ-uv jo kavnâđ. Kiälkkákiäinui meerhah láá meddâlistum já jieŋah rašoh liävttoin.

Kesimáánu lii nurhe tyehin, já talle puátih saavzah kesipaargon Lemmee aalmuglâšmeeci Kaabi Joovnâ sajan sehe Ucjuuv Jeagilveagán. Saavžâi mieldi puátih meiddei savzâkeččeeh.

Savžâkeččeeohoid peessih olásuttiđ korona-pandemiast huolâhánnáá. Savžâkeččeeohoh vyelgih joton nuuvt Lemmeest ko Jeagilveagist jonsâhpeeivi maŋa já pišteh čohčâmáánu aalgâ räi.

Pänituoddâr meccikuávlust Avveeljuuvâ rasta Kuldalan mannee šalde vahadui tälviv lusis muotânuáđi tiet ijge tot lah tääl kevttimnáálá. Šalde tivvompargoh láá álgám, mutâ tain láá peessâm ovdániđ hitásuboht ko vuávájum. Tivvompargoid láá ferttim koskâldittiđ älgee sijvottisvuođâ tiet. Pargoh juátkojeh arvâlus mield jonsâhpeeivi maŋa já šaldereemoont valmâštuvvoo syeinimáánu pelimudo suulâst.

Pänituoddâr meccikuávlust Avveeljuuvâ rasta Kuldalan mannee šalde vahadui tälviv lusis muotânuáđi tiet ijge tot lah tääl kevttimnáálá. Kove: Aimo Leppäkangas.

Luándust jotemàn korona-ääigi kávnojeh ravvuuh korona-sijđoidân: https://www.luontoon.fi/fi/koronavirusohjeet.

Lasetiäđuh