Uđâsarkkâdâh

Uđđâ ihe lii álgám já skammâ nohá forgâ Paje-Laapist. Meccihaldâttâs Luándupalvâlusâi ive vuossâmuuh pargoh láá moottorkiälkkákiäinui merkkimpargoh jieŋâi alne. 

Piäiváš lii pajanâm vuossâmuš tove Avelist koskoho 9.1. Aanaar markkân pirrâsist piäiváš paijaan vástuppeeivi 11.1., Ucjuuvâst puátteeoho koskoho 16.1. já Nuorgamist vástuppeeivi 18.1. Nuorgamist piäiváš kolliistâl vuossâmuu peeivi ääigi 7 minuttid almeroobdâ pajaabeln.

Moottorkiälkkákiäinui merkkimpargo lii joođoost Aanaar kuávlust. Kove: Aimo Leppäkangas.

Moottorkiälkkákiäinui merkkimpargoh láá jo vuálgám joton Aanaar kuávlust. Aanaarjäävri riddokiäinuh valmâštuveh vuossâmužžân. Oho kuulmâ ääigi lii tárguttâs merkkiiškyettiđ Aanaarjäävri stuorrâ seelgij kiäinuid. Avžuuttâs lii, ete jieškote-uv vuárdá, ete miärkkumeh láá valmâšeh stuorrâ seelgij oolâ, ovdilgo mana tohon. 


Aanaar kuávlust ulmen lii uážžuđ  merkkimpargoid porgum uđđâivemáánu ääigi. Ucjuv kuávlust tuoddârij alne lii tuše 10 cm muotâ já ton tiet oro, ete merkkimpargoh iä peesâ tobbeen joton vala uđđâivemáánust. Jis muotâkeerdi lii tuárvi kossuv kuovâmáánust, te merkkimpargoh porguuh talle.


Muotâ lii jyehi saajeest Aanaar já Ucjuv kuávluin uáli uccáá. Tom kalga väldiđ huámmášumán, jis lii vyejimin moottorkiälháin kiäinuin, moh láá eennâm alne.


Meccihaldâttâs kiävttá kiälkkákiäinui merkkiimist ruopsis saagijd, moin láá sirottâsah. Meccihaldâttâs tuáivu, ete jieškote-uv olmooš teikâ ovtâskâs tááhu, kote haalijd merkkiđ jieijâs kiälkkákiäinuid, moh iäráneh Meccihaldâttâs merkkejum kiäinuin, kiävtáččij ereslágánijd meerhâid, aainâs-uv kiäinu algâuásist.  Ovdâmerkkân rissemeerhah láá pyereh. Taat išedičij, ete meerhah iä čájádit vyeijeid.

Merkkejum kiälkkákiäinu Aanaarjäävri alne. Kove: Aimo Leppäkangas.


Loopân mij tuáivuttep Luándupalvâlusâin Pyeri uđđâ ihe - tuáivui mield juáháš puáhtá jotteeđ já navdâšiđ luándust nuuvt ennuv, ko máđulâš.

Lasetiäđuh: