Tääl lii oppeet tot äigi ivveest, ko piäiváš luáštá já čiähádât horisont tuáhá masa kyevti mánuppaje ááigán tavemus Laapist. Piäiváš luáštá Njuárgám siijdâst Ucjuuvâst majemuu tove tuorâstuv 24.11. Čuávuváá tove piäiváš kuárŋu tobbeen horisont paajaabel uđđâivemáánu 18. peeivi.

Ucjuuvâst skammâ álgá kyehti peeivi ovdeláá ko Njuárgámist, já siämmáánáál nohá meid kyehti peeivi maŋeláá. Anarist piäiváš luáštá majemuu tove juovlâmáánu 2. peeivi, skammâ pištá váhá paijeel mánuppaje. Suáđigilist vááijuv oho kukkosâš skammâ lii juovlâi ääigi.

Kuhes já lieggâ čoovčâ maŋa láá sälttipuolâšeh puáttám Aanaar já Ucjuv kuávlun. Muádi moonnâm oho ääigi mittárlovoh láá jottáám love já kyehtlov puolâšceehi pirrâsijn. Uccâ jávrááh láá jiäŋŋum, mut meid sehe virdečääsih já stuárráb jäävrih láá jiäŋumin. Jieŋâi alne jotteeh ferttejeh kevttiđ jiermi já visásmittiđ, et jieŋah killájeh.

Muotâ lii iveääigi uáinust vala uccáá. Muotâkeerdi asodâh lii lovmat senttid. Asettes muotâkerdi já puolâšeh išedeh čácáduvâid jiäŋŋuđ jotelubbooht já jođálmitteh jieŋâkeerdi assoom.