Kiđđâtälvi muttui Anarist já Ucjuuvâst kiđđâkeessin muáddi peeivist kiäsáditij já arveškuođij. Moonnâm peeivij ääigi lii lamaš vuáruluvâi lieggâ šoŋŋâ já arvešoŋŋâ. Jieŋâ lii suddâm juuvâin sehe ucebijn jaavrijn Anarist. Aanaarjäävrist lii val jieŋâ, mut ridoh láá sudeh. Jieŋâi oolâ ij kannat innig moonnâđ.
Muotâ ij innig vuovdijn lah. Tuoddârist kal lii val muotâ. Oorvij já muotâsuddeem tiet čäciuáivih láá ollâgâsâst Ucjuuvâst já Lemmest. Aanaarjäävrist tot lii pajanškuáttám. Juvduu päälgis lii potkânâm juuvâ maadâ peln ovdil Njuámmilcooskâs šalde.
Lemmee aalmuglâšmeeci juhâleehi pálgái miätá piäsá jo väzziđ. Lemmejuuvâ jaavrij lii val jieŋâ veik juuhâ lii ávus eres oosijn. Oro, ete jäävrih-uv suddeh algâohhoost já loppâ ohhoost lii tárguttâs peessâđ kárbáin tärhistiđ, ete puoh lii oornigist juhâleevi vandârdemsoojijn.
