« Takaisin

Skammâ lii nuuhâm já kiälkkákiäinui merkkimpargo lii porgum

1/23/18
Taan oho aalgâst lii Aanaar já Ucjuv kuávlust lamaš 30 cekkid puolâš. Skammâ lii kuittâg nuuhâm já piäiváš puáhtá oppeet uáiniđ já stuorrâ tábáhtushân tot ain lii-uv uáiniđ ton vuosmuu tove. 
 
Skammâ lii nuuhâm. Kove: Markku Välitalo.
 
Moonnâm ohhoost lâi stormâ já ton tiet tuoddârij alne já eres ávus soojijn lii cuáŋui. Tyebbin tääbbin pieggâ posolij muottuu meddâl já eennâm masa putesin. Pieggâ čeergâi muottuu eromâšávt stuorrâ jaavrij jieŋâi alne, te tobbeen jođedijn kalga leđe  várugâs. Ovdil stormâ jienâi alne lâi ennuv čääci, mut ko tääl, ko muotâ lii  stuorrâ jaavrij jieŋâ alne uccáá, te tobbeen tile puáránij. Ucceeb meccijaavrij alne lii vala-uv čääci. 
 
Moottorkiälkkákiäinui merkkimpargo lii masa jo porgum. Meerhah váiluh tuše Čevetjäävri-Polmakjäävri kooskâst Čaarâjäävri já Čuomâsjäävi alne sehe  Aanaar já Ucjuv kooskâst Čovčjäävri já Sevžjäävri alne.
 
Lemmest láá pargeeh lamaš joođoost moottorkiälháin já kiälkkákiäinuh láá merkkejum juhâleevist Njurgoiluovtâ já Kollehaammân kooskâst. Kesipálgá meerah išedeh, ko juátká Kollehamânist Suohpášávži Kuldalân.
 
Mudoi-uv Lemmest láá tälvivandârdemmáhđulâšvuođah puáránâm, ko moonnâm keesi ääigi Seereehnjiärán valmâštui uđđâ peivitupe. Tääl Njurgoiluovt já Suohpášávži Kuldal kooskâst láá tuveh čuávuvávt:
 
  • Njurgoilluohtâ - Seereehnjeeri peivitupe, suullân 10 km.
  • Seereehnjeeri peivitupe - Rovâdâs ävđintupe, suullân 4-5 km
  • Rovádâs ávdintupe – Kollehaammân ävđintupe, suullân 6 km
  • Kollehaammân ävđintupe - Suohpášávži Kuldal, suullân 5 km