« Takaisin

Reppuretki.fi já Maadânuorttii-Suomâ áámmátollâškovlâliih hästih luonij nurâmân

9/7/18

Puurkih, lastik, folio, tubbáák. Luándust jotteeh láá iänááš čurgâdis juávkku, mutâ muáddi-uv turdedeijee tovâtteh paa luándust. Reppuretki.fi-siijđoh já Maadânuorttii-Suomâ áámmátollâškoovlâ vandârdeijeeh hästih ulmuid nuurrâđ luonijd luándust já tuáimih ovdâmerkkân čohčâvandârdemmäđhistis Myeđhituoddârist. Västid hástusân!

 
Čohčâmáánu 15. peivi lii aalmugijkoskâsâš čurgimpeivi, mutâ luándu pyerrin pyere puáhtá porgâđ veikâ jyehi peeivi. Luonij kyeđđim luándun lii čuolmâ maaŋgâ enâmist. Luándu pilledeijee lyeneh láá meid Suomâst. Toh leggistuvvojeh luoddâpiälláid já joba vandârdeijeeh, kiäh vyelgih navdâšiđ luándust, sättih kyeđđiđ taid maŋŋaalsis. Talleba kale páácá luándust navdâšem uccen nuubijd vandârdeijeid.
 
Reppuretki.fi-siijđoh já Maadânuorttii-Suomâ áámmátollâškoovlâ vandârdeijeeh hästih puoh luándust jotteeh nuurrâđ luándun kulâmettum luonijd já tiiŋgâid. 
Kove: Olli Järvenkylä
 
"Aalmuglâšmeecij já eres luándučuosâttuvâi lyenihuolâttâsân kuleh ennuv euroh jyehi ive. Tađe stuárráb summe lii, mađe eenab huolâhánnáá luonijd kyeđih luándun, já tot lii meddâl pargoost, maid porgâp vandârdeijei já luándu pyerrin. Lii tuođâi suotâs, ete láá luándu usteveh, kiäh jieijâs ovdâmerháin movtijditeh iärásijd-uv toimâđ olmânáál", kijttá miäcádâhhovdâ Pirjo Seurujärvi Meccihaldâttâsâst uáppeid.
 
Suulân neljilov uápped Suomâst, Saksaast já Nuorttâriijkâst vandârdeh oho Myeđhituoddâr meccikuávlust. Meccijotteemtááiđui máttááttâllâm paaldâst uáppeeh noreh vandârdeijei, kuálásteijei já miäcásteijei kyeđđim luonijd. Tulâstâllâmsoojijn láá ovdâmerkkân ruástum seilâttâspuurkih, folio já lastik. Uáppeeh pyehtih luonijd luodâ piällás, kost Meccihaldâttâs Luándupalvâlusah viäžžá taid pasâttâshuolâttâsân tuálvumnáál.
 
"Mij lep uáppeiguin vandârdâm Myeđhi meccikuávlust iheluuvijd. Mij halijdep puátteevuođâst-uv peessâđ navdâšiđ putes luándust. Tondiet mij movtijdittep eres-uv vandârdeijeid uásálistiđ čurgimtalgoid vandârdemkuávluin já aalmuglâšmeecijn", muštâl lehtor Tommi Pantzar Maadânuorttii-Suomâ áámmátollâškoovlâst. 
 
Čurgip Suomâ oovtâst. World Cleanup Day čuákkee ulmuid miätá maailm toimâđ putásub pirrâs pyerrin. Piirâs čorgejuvvoo siämmáá-áigásávt 150 enâmist.
 

Lasetiäđuh