« Takaisin

Meccijotolâhloveh staatâ enâmáid tääl uuccâmnáálán elektronlávt

3/12/18

Meccijotolâhloveh staatâ enâmáid láá tääl uuccâmnáálán älkkeht Eräluvat.fi-nettikäävpist eereeb kuulmâ tavemui kieldân. Uđđâ lopeuuccâm kuáská jotoluv meccijotolâhluodâi alne, meiddei luodâi ulguubeln sehe muottuu ääigi já kesieennâm ääigi. Loveh pyehtih ain uástiđ Meccihaldâttâs äššigâspalvâlemsoojijn já palvâlemnumerist.

Luoddâloveh staatâ enâmij máávsu vuálásiih, virgálâš kiäinuin uážžu vyeijiđ moottorkiälháin nuuvtá

Meccihaldâttâs moottorkiälkkávyeijimloveh láá máávsu vuálásiih, epivirgálâš kiäinuh, moh laavâ mield miäruštâllojeh meccin. Moottorkiälkkávyeijee puáhtá skappuđ taid luoddáid persovnlâš teikkâ perruu ohtâsii máávsu vuálásii love. Love hadde nubástuvá oovces vittálove euron ton mield, mon kuhes ááigán love ocá. Päikkikieldân uccum lope lii nuuvtá.

Virgálâš moottorkiälkkákiänuh vuod láá moottorkiälkkájotolâhân uáivildum, kiäinujotolâhlaavâst miäruštâllum kiäinuh. Virgálâš kiäinui alne vyeijim lii nuuvtá, tast peerusthánnáá kiän omâstâm enâmist maađij lii. Kiäinui paijeentoollâm kulloo kieldáid teikkâ moottorkiälkkáservijd. Kiäinuid ulguubel moottorkiälkkávyeijim váátá ain eennâmiäigád teikkâ moottorkiälkkáluodâ paijeentuállee peeleest love, eereeb jieŋâ alne, kost uážžu vyeijiđ moottorkiälháin riijâ. Staatâ enâmáid love mieđeet Meccihaldâttâs.

Eres meccijotolâhloveh staatâ enâmáid

Luodâi ulguubel meccijotolâh muottuu ääigi já puoh kesieennâm áigásaš meccijotolâh staatâ enâmijn lii laavâ mield uáivivuáđujurduu mield kieldum. Agâstâllum táárbun Meccihaldâttâs puáhtá uuccâđ sierâ meccijotolâhlove.

Suujah meccijotolâhlopeucâmušân láá ovdâmerkkân tárbu jotteeđ kiddodâhân losádâs ulguubeln, pivdoellee- já kyelivaariitiipšon lohtâseijee tooimah, tutkâmpargo teikkâ tábáhtus orniim. Taiguin perrum máksu lii kiddâ tast, occoo-uv lope päikkikieldân teikkâ mon vuáđulii čielgâdempargo teikkâ vuoigâdvuođâlii kieđâvuššâm Meccihaldâttâs karttá porgâđ.

Tággáár meccijotolâhloveh kieđâvuššojeh majemustáá 15 argâpeeivi siste lopeucâmuš kyeđđimist.

Spiekâstâh elektronlâš luoddâlopeucâmân lii vala Iänuduv, Aanaar já Ucjuuvâ kieldâlij päikkikieldâsis uccum muottuu ääigi meccijotolâhloveh. Toh occojeh ain Meccihaldâttâs páihálâš äššigâspalvâlemsaajeest. Ive 2020 taid-uv puáhtá uuccâđ elektronlávt.

Lasetiäđuh