« Takaisin

Kiđđâ puátá Tave-Laapin

5/8/18
Taan räi tile enâduvvâst Aanaar já Ucjuv kuávluin lii lamaš uáli tálvááh. Tuoddâr kuávluin muotâ lii čiehâm eennâm val masa tievâslávt – pievlah láá uccáá. Vuovdijn já jeegij alne lii jo pievlâm eenâb. 
 
Tave-Laapi tuoddâr kuávluin lii val tälvi. Taat kove lii Lemmee aalmuglâšmeecist. Kove: Iisko Näkkäläjärvi
 
Ceehi lii lamaš muáddi iđedist já tot lii išedâm enâduvvâst jotteid váhá, mut peiviv muotâ lii muttum suávlin. Čääci lii tiävdám ruugijd enâmist já tot kolgá vielttijn. Sijvottisvuotâ lii tääl joođoost já jottem enâduvvâst eidu tääl lii vaigâd. 
 
Vyesimáánu Kaldoaivi meccikuávlust. Kove: Aimo Leppäkangas.
 
Silesjuuvâ njälmeest. Kove: Aimo Leppäkangas
 
Meccihaldâttâs lii meddâlistám moottorkiälkkákiäinui meerhâid jieŋâi alne. Ton saajeest, ete val vuolgâččij jieŋâ oolâ, lii-uv pyereeb vyerdiđ, ete jieŋâ suddá já čääci lieggân, te piäsá vuoijâđ. Puáhtá leđe, ete tot tábáhtuvá jotelávt, ko šoŋŋâtiäđáttâs loppeed masa 20 cekkid lieggâs loppâookon. Jis nuuvt kiävá, te talle juuvah čáállojeh. Pešnirihhááš lii oinum Tave-Laapist já puáris suomâkielâg eđâlduv mield tot meerhâš, ete keesi lii jo alda.